Eysturoyggin er - við síni vídd upp á 268 km2 - næststørsta oyggj í Føroyum. Her búgva umleið 11000 fólk. Gott bussamband er, bæði í oynni og til hinar partarnar av landinum. So sigast kann, at oyggin er ein miðdepil í Føroyum. Oyggin bjóðar teimum vitjandi nógvar upplivingar. Vakurt landslag, søgulig støð, hugnaligar bygdir og framkomnar og nýmótans bygdir og býir.

Í syðra partinum á oynni er landslagið, eftir føroyskum viðurskiftum, slætt og lætt er at ferðast til gongu. Norðantil á oynni er brattari, við høgum fjøllum. Eitt teirra er Slættaratindur, sum við sínum 880 metrum er hægsta fjall í Føroyum.